Cronicas d´Ardanau

Cronicas d´Ardanau ye entremeyas d´un libro de memorias –que más que más ye ixo–, una nobela e un estudio d´antropolochía. L´azión trascurre á o largo de l´añada – u millor, curso escolar – de 1953-1954, en una bal pirenenca. O protagonista e narrador ye un mozet de 10-11 años d´edá. Pero ixas memorias que o mozet escribiba – e que, salbatas de l´olbido, agora plegan ta nusatros – son enriquitas con comentarios autuals feitos por un adulto – l´autor d´o libro – que alufra o mundo con a perspeutiba que li atorgan as añadas. Asinas beyemos una singular aportazión literaria en a que o concaramiento d´o estilo literario e a mena de luenga conleba tamién l´acomparanza entre unos tiempos e trazas de bida con belatros de meyo sieglo dimpués.